Kɔngɔ gɛnna ka bɔ duguw kɔnɔ


Dugu kamalenninw jɛɛrɛlen dugu fini foro dɔ kɔnɔ

Ɲinan, kɔngɔ kɛra yɔrɔ caman na Mali la. Waati bɛ tɛmɛn cogo min, sumaw bɔrɔ sɔngo bɛ yɛlɛ ka taa a fɛ fɔ ka se hakɛ la i ko min ɲogɔnna ma deli ka kɛ an ka jamana kɔnɔ bawo cɛkɔrɔ ba dɔw y’o sɛmɛntiya k’olu ma deli ka ɲɔ bɔrɔ san 5100 Mali kɔnɔ fɔlɔ. Togodala mɔgɔw sɛgɛnna kosɛbɛ bawo 5100 sɔrɔli ma nɔgɔ u ma ka ɲɔ san k’u ka duw balo n’a ye. A ko ka gɛlɛ kosɛbɛ. Segu Bamanan dɔnkili caman b’o fɔ ko « mɔgɔ ka na i yɛrɛ faga ɲani ye bawo i tɛ n’a kɔfɛ hɛɛrɛ sɔrɔ. » O de kɛra Mali sɛnɛkɛlaw ta ye. U y’u muɲu, k’u jija, k’u cɛsiri, dɔni dɔni baloko fɛ fɔ ka se nin waati in ma, waati min na, bolo munumunuko kelen dɔrɔn, kɛlɛ cɛfarinw kawulɛ kɔngɔ waati la duguw kɔnɔ, n’o ye maɲɔ ni fini ye, olu sinna ka kɔngɔ gili bɔn, k’a tufa k’a fili dugu kɔ fɛ i n’a fɔ wulu fatɔ, mɔgɔ si tɛ min fɛ i ka so.

Fini

Ɲinan, duguw kɔnɔ, sɔmiɲɛ bɛ ka taa a taa cogo kɔrɔ ɲuman na. An bɛ se k’a fɔ sanji nako ka ɲi alisa ali n’a ya sɔrɔ a ye tiɲɛni kɛ yɔrɔ caman. Foro bɛɛ yeko ka ɲi, wa u lajɛli bɛ mɔgɔ nisɔndiya, k’i jigi tugu. Sɔmiɲɛ foro sɛnɛ baaraw banna. Kalo saba kɔ fɛ, sɛnɛkɛlaw ye dabaw fili jigiɲɛw jukɔrɔ, k’u lafiɲɛ bɔ tile damadɔ, ka sɔrɔ ka wɔlɔsɔw ni beesew ta ka sin fini forow ni kaba forow ma.

Kaba foro

Kari tɛmɛnnen in, ne yɛrɛ taara o finikan yɔrɔ in dɔ la, n talen bɔ n somɔgɔw ye Segu. N taara kaba foro dɔw la fana ka sɔrɔ u tigi bɛ k’u kari. Olu bɛɛ tun ye foro ɲumanw ye, wa u tun bɛ mɔgɔ jigi tugu k’i hakili sigi. O la, n y’a faamu k’a fɔ ko nin ye kɔngɔko nɔgɔyalen ye an ka togodaw la fɔlɔ, kɔnɔgɔ min kɛra an jɔɲɛgɛn ye san bɛɛ kɔnɔ. Sɔni, ɲɔtigɛw bɛ daminɛ. O bɛ tugu finiko ni kabako la, o la, kɔngɔko bannen y’o ye pewu. An bɛ yɔrɔ min na i ko sisan, kɔngɔko nɔgɔyara an ka jamana kɔnɔ k’a sababu kɛ fini ni kaba ye. Olu de ye dumuni fanbaw ye an ka duguw kɔnɔ sisan. Sɔ tun ka kan ka fara fini ni kaba kan ka nin kɔngɔba in gɛn, nka, k’a sababu kɛ sanji caya ye, sɔ ma se ka den fɔlɔ, bawo a mago bɛ funtni hakɛ min na walasa ka den, a m’o sɔrɔ. O de b’a to an bɛ se k’an hakili bɔ sɔ ɲɛni kan ɲinan, n’i ye jatemin kɛ.

Nisɔndiyalen bɛ, n jigitugulen bɛ k’a sababu kɛ n ye min ye sɔmiɲɛko la n ka nin taama in sen fɛ. Wa, an ka dugaw kɛ sɔmiɲɛ ka taa nin cogo in na.

About these ads

One Comment to “Kɔngɔ gɛnna ka bɔ duguw kɔnɔ”

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s

Suivre

Recevez les nouvelles publications par mail.

Rejoignez 1 363 autres abonnés

%d bloggers like this: